ឯកឧត្តម ស សុខា អំពាវនាវសុំឲ្យអ្នកពាក់ព័ន្ធទាំងអស់ចូលរួមបង្ការ ទប់ស្កាត់ បញ្ហាគ្រឿងញៀន អេដស៍ និងសុវត្ថិភាពចរាចរណ៍
21-November-2019 | ដោយ ពលមនសិការ
បន្ទាយមានជ័យ៖ នៅថ្ងៃទី២១ ខែវិច្ឆិកា ឆ្នាំ២០១៩ ក្រោមកិច្ចសហការជាមួយក្រសួងអប់រំ យុវជន និងកីឡា អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន នៅមន្ទីរអប់រំ យុវជន និងកីឡា ខេត្តបន្ទាយមានជ័យ មានបើកវគ្គផ្សព្វផ្សាយពីគ្រោះថ្នាក់នៃគ្រឿងញៀននិងសុវត្ថិភាពចរាចរណ៍ផ្លូវគោក ក្រោមអធិបតី ភាពឯកឧត្តម ស សុខា រដ្ឋលេខាធិការ តំណាងឯកឧត្តម បណ្ឌិត សភាចារ្យ ហង់ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា ដោយមានការអញ្ជើញចូលរួមពីលោកជំទាវបណ្ឌិត សឿ សុជាតា អនុរដ្ឋលេខាធិការ ឧត្តមសេនីយ៍ទោ លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា អគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តម លី សារី អភិបាលរង តំណាងគណកម្មាធិការត្រួតពិនិត្យគ្រឿងញៀនខេត្ត តំណាងក្រុមប្រឹក្សាយុវជន យុវជនកាយរិទ្ធ កាកបាទក្រហម សរុបជិត៣០០នាក់។
លោក ឈូ ប៊ុនរឿង ប្រធានមន្ទីរ អប់រំ យុវជន និងកីឡាខេត្ត បានស្វាគមន៍ និងបានជម្រាបជូនពីកិច្ចខិតខំអនុវត្តនូវផែនការប្រយុទ្ធប្រឆាំងគ្រឿងញៀនខុសច្បាប់តាមសាលារៀន បំផុសឲ្យមានការចូលរួមរបស់សិស្សានុសិស្ស លោកគ្រូអ្នកគ្រូ បុគ្គលិក សិក្សា កាន់តែសកម្មផុសផុសបង្ការទប់ស្កាត់ប្រឆាំងគ្រឿងញៀន។
ថ្លែងក្នុងនាមឯកឧត្តម អ៊ុំ រាត្រី អភិបាលខេត្តឯកឧត្តម លី សារី អភិបាលរង តំណាងគណកម្មាធិការត្រួតពិនិត្យគ្រឿងញៀនខេត្ត បានមានប្រសាសន៍ថា ខេត្តបន្ទាយមានជ័យ មិនជាទីតាំងផលិត ដាំដុះ ចរាចរណ៍ គ្រឿងញៀនឡើយ តែជាខេត្តទទួលរងគ្រោះពីការលាក់លួចចែកចាយប្រើប្រាស់ដែលសមត្ថកិច្ចនិងអ្នកពាក់ព័ន្ធទាំងអស់ខិតខំបង្ការ បង្ក្រាប បទល្មើសគ្រឿងញៀននិងស្តារនីតិសម្បទាអ្នកញៀនគ្រឿងញៀន។
ក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ ឧត្ដមសេនីយ៍ទោ លឹម តុងហួត បានមានប្រសាសន៍ថាកាប្រើគ្រឿងញៀនគឺបំពានច្បាប់ សម្លាប់គ្រួសារ ប្រហារសហគមន៍ ការចូលរួមបង្ការទប់ស្កាត់បញ្ហាគ្រឿងញៀនគឺជាភារកិច្ចរួមរបស់យើងទាំងអស់គ្នា ការស្វែងយល់ដឹងច្បាស់ពីបញ្ហាគ្រឿងញៀន ជួយផ្សព្វផ្សាយបន្តទៅមិត្តភក្តិនិងមនុស្សជាទីស្រលាញ់ពីគ្រោះថ្នាក់នៃគ្រឿងញៀនពិតជាអាចជួយពួកគេកុំឲ្យធ្លាក់ទៅក្នុងអន្ទាក់នៃគ្រឿងញៀន កាត់បន្ថយបានអំពើហិង្សា និងឧក្រិដ្ឋកម្ម សហគមន៍មានសុវត្ថិភាព។
ក្នុងនាមឯកឧត្តមបណ្ឌិត សភាចារ្យ ហង់ជួន ណារ៉ុន រដ្ឋមន្ត្រី ឯកឧត្តម ស សុខា រដ្ឋលេខាធិការ បានមានអំពាវនាវសុំឲ្យអ្នកពាក់ព័ន្ធទាំងអស់ចូលរួមបង្ការទប់ស្កាត់បញ្ហាគ្រឿងញៀន អេដស៍ និងសុវត្ថិភាពចរាចរណ៍ ដើម្បីអនាគតយើងទាំងអស់គ្នា និងបានសំណូមពរដល់ៈ
១.មន្ទីរអប់រំ យុវជន និងកីឡា ខេត្ត ពិនិត្យលទ្ធភាពរៀបចំចងក្រងយន្តការគ្រប់គ្រង ព័ត៌មានទាន់ហេតុការណ៍ និងរបាយការណ៍ទាន់ពេលវេលា នៅគ្រប់កម្រិតរដ្ឋបាលគ្រប់គ្រង រួមមាន ក្រុមការងារនៅថ្នាក់មន្ទីរអប់រំ យុវជន និងកីឡាខេត្ត ក្រុមការងារនៅតាមការិយាល័យអប់រំ យុវជន និងកីឡា ក្រុង/ស្រុក និងក្រុមការងារនៅតាមគ្រឹះស្ថានសិក្សាសាធារណៈនិងឯកជន។
២.គ្រប់គ្រឹះស្ថានសិក្សាសាធារណៈ និងឯកជន ពង្រឹងចលនាក្រុមប្រឹក្សាកុមារ/យុវជន ជាចលករសម្រាប់ការងារផ្សព្វផ្សាយ អប់រំបន្តនៅក្នុងក្រុម គ្រឹះស្ថានសិក្សា និងតាមសហគមន៍ ពីគ្រោះថ្នាក់បង្ករដោយការប្រើប្រាស់គ្រឿងញៀន និងការអប់រំពីការគោរពច្បាប់ចរាចរណ៍។
៣.ជំរុញនិងលើកកម្ពស់ចលនាអប់រំកាយជាប្រចាំ និងកីឡាសិស្ស/យុវជន ដោយមិនទុកអ្នកណាម្នាក់នៅក្រោយ ដើម្បីការអភិវឌ្ឍវិន័យ និងសុខភាពល្អ។
៤.ពង្រឹងការត្រួតពិនិត្យជាប្រចាំការលើកកម្ពស់បរិស្ថានល្អនៅតាមគ្រឹះស្ថានសិក្សា ថ្នាក់រៀន និងធានាឱ្យបានបំរាមលក់ដូរ និងនាំចូលចំណីអាហារដែលបង្ករបញ្ហាដល់សុខភាពកុមារ/យុវជន។
៥. ជំរុញបន្តការចូលរួមគ្រប់គ្រឹះស្ថានសិក្សាឱ្យមានភាពគគ្រឹកគគ្រេង ក្នុងទិវាអន្តរជាតិប្រយុទ្ធប្រឆាំងគ្រឿងញៀន២៦ ខែមិថុនា និងទិវាជាតិប្រយុទ្ធប្រឆាំងអំពើជួញដូរមនុស្ស ៕
ចំនួនអ្នកទស្សនា
- ថ្ងៃនេះ3731
- ម្សិលមិញ20231
- សប្តាហ៍នេះ82811
- ខែនេះ104691
- ឆ្នាំនេះ104691
- សរុប20547147